|
|
Maxamadow adaa dhuuxayoon
Eray ku dhaafayne
Lexejeclo adaa dhaadayooy
Kuu dhadhamaysaaye
Adigaa wixii dhacay ogaa
Dhag iyo muuqaale
Sanad iyo anoo dhawr Bilood
Dhoosha ka qoslaayay
Dhuudhaaf wixii aan ku jiray
Qaaday dhoobada e
Waxba dhuuman maynee
Haddaan dhayda ka caddayne
Waxay dhiiqdo Maandeeq
Hadaan dhiil ku shubayaaye
Dhibtay sheegataan hadeer
Dhab uga sheekayne
Wixii dhacay wixii dhici karaan
Kuu dhig dhigayaaye
Maaneeq wallaal way dhashoo
Waa la dhurayaaye
Dhalaan iyo duqii maali jiray
Dhure ma siiyaane
Dheglay kalama hadho caanihii
Dhoobogii wadaye
Iyadana dharkayn baa ku maran
Dhaqasho ceebteede
Anna dhuugga cunayaan intaa
Dhiib is leeyahaye
Dhakhtar iyo waxaan raadiya
Dhib iyo waabaye
Dhugatiyo waxaan uga baqaa
Kud iyo dheeraade
Waxaan dhimo waxaan dhimay
Dhab iyo xeesheede
Adna dhoofka kula jiitay baan
Dhagida diidaaye
Dhuuxiyo laftaan kaa jeclaa
Inaad dhawaataaye
Hayeeshee waxaan dhawrayaa
Waa Dhulka oo qaboobiyo
Dhibic mahiigaane.
Intaa an dhaafe markaan
Hoos u dhigo hawsha
Dhamac iyo dabbaa shidan wallaal
Oo na dhaawacaye
Adna dhugo Maxamadow
Dunidii dheeligii badaye
Waa duni ninkii dhiig lahaa
Dhimay dadaalkiiye
Waa duni nimaan dhaqi aqoon
Xoolo dhaansadaye
Waa duni ninkii dhami lahaa
Dhigay hadhuubkiiye
Waa duni ka dhiib iyo u dhiib
Laysku dhaarsadaye
Waa duni dhac iyo tuugadii
Dhaaftay xadhigiiye
Waa duni xishookii dhinto
Been la dhurayaaye
Waa duni dhaydiyo dhanaan
Dhalay ka maaleene
Waa duni dhawaaqi dadnimo
Dhawrsanaan galaye
Waa duni dhabtii dawladnimo
Layska dhigay meele
Waa duni dhaqankiyo hiddaha
Ceeb la dhaansadaye
Waa duni dhafoor taabashada
Nacas ku dhaataaye
Waa duni dhalaan iyo carruur
Dhereg ka quusteene
Waa duni ninkii dhaarta maray
Dheesha tumayaaye
Waa duni dhufays iyo colaad
Laysla dhigayaaye
Waa duni sakhraan dhawrayoo
Tallo u dhiibteene
Waa duni dhamaan ciidankii
Gaajo dhacayaaye
Waa duni distoorkay dhigteen
Dhinac ku tuureene
Waa duni Ninkii dhaanka raray
Dhumiyay Awrkiiye
Waa duni Ninkii dhiiranaa
Dhiibay keenada e
Waa duni korankiyo dhufaankii
Dhibida saydheene
Waa duni dadkii dhaygagoo
Dhabanka haystaane
Waa duni ninkoodii dhibane
Gacanta dhiibtaaye
Waa duni dhawaaqi xornimo
Dhego furaysteene
Waa duni I dhaafaay Nin yidhi
Daba dhaqaaqeene
Waa duni ninaan dhururi hayn
Daaro dhisayasye
Waa duni dhaliishii timaad
Xeerba loo dhigine
Waa duni ninkii dooda fura
Jeelka loo diro e
Waa duni duqay iyo wax garad
Deedifayn tahaye
Waa duni dulqaadkii dhintoo
Lays dardarayaaye
Waa duni daruurah cirkii
Caad ku dadanyiine
Waa duni dantii aad lahayd
Doolar jilayaaye
Dheeraatay sheekaduye
Waxaan ku soo dhaabay
Maantyo dharaartaad ogayd
Wax isma dhaamaane
Dhuuradiyo dhurwagii ku helay
Dhibe agoontiiye
Dhamastiyo hadday geedihii
Debed u dhoofsheene
Dhulkii Hooyo weeyaan
Halkaan dhawra leeyahay
Mana aha wax dhiil iyo
Ku yimid gacan u dhiibkiiye
Dhibyaraan hadaad moodaysaan
Waa la dhuun baxaye
Dhul gariir haddii aad taqaan
Kala dhig weeyaane
Mana gayo dhalool yahay
Dhaadashada qaare
Dhugo xorayntii Rag baa
dhiig u soo shudaye
Ninka aan intaa dhaadinow
Dhoohanaad tahaye
Dhaameel iyo nin qaatana
Rag baa Buug kusii dhigaye
Nin xaaraanta dheefsaday
Marbuu dhiig ka tufayaaye
Nabsiguna ma dheeroo
Mar buu dhiilku qubayaaye
Dhabadii u raacaan aqaan
Qaar horoo dhacaye
Hala dhawro dharaaraa hadho
Dhiman shinkoodiiye ??????
Dhanka kale Illaah baan baryee
Dhaha bal aamiinta
Allahayoow dhamaadoo xoolihii
Dhaafe Ehelkiiye
Allahayoow dhul may beerano
Dheef ma helayaane
Allahayoow dhaqaalana ma jiro
Cidi ku dhaantaaye
Dhaaxay nimcada dhaansadeen
Dhayna qubayeene
Hayeeshee dhalaal meel ma dhigan
Dhaxalku waa hayne
Dawladuna ma dhaanto iyaba
Dhib iyo hawsheede
Naga dhici Abaaraha Rabboow
Dhabar jab weeyaane.
Aamiin…Aamiin…Aamiin.
Layma sheegin hay odhan!!!!!
Ugaas Axmed Maxamed Siciid (Cali Mahdi)