BALIGUBADLE MEDIA
Axsaabta Muncaaradka Iyo Madaxwaynaha Somaliland oo Isa Soo Horfadhiistay Qodobadda Is Fahan Ahna Ka Soo Saaray Khilaafkoodii
December 17, 2018 - Written by admin

Madaxweynaha Somaliland Muuse Biixi Cabdi iyo Hoggaanka Saddexda Xisbi ee UCID, Waddani iyo Kulmiye, ayaa isla qaatay in doorashada golayaasha deegaanka iyo Wakiillada ee wakhtigeedii dib uga dhacday ku qabsoonto dhammaadka sannadka foodda innagu soo haya ee 2019-ka, ka dib markii ay caawa kulan ku yeesheen Madaxtooyada Hargeysa.

k2 k3 k4 k5 k6

Sidaa waxa lagu sheegay War-murtiyeed dhawr qodob ka kooban oo uu ku saxeexnaa Afhayeenka madaxtooyada Somaliland Maxamuud Warsame Jaamac, kaas oo isla caawa nuqul ka mid ahi soo gaadhay shabakadda caalamga ah ee Baligubadlemedia

“WAR-MURTIYEED: 16/12/2018 —– Madaxweynaha Jamhuuriyadda Somaliland, Mudane Muuse Biixi Cabdi, oo uu wehelinaayo Madaxweyne ku xigeenka Somaliland, Mudane Cabdiraxmaan Cabdilaahi Ismaaciil (Saylici), ayaa caawa kulan muhiima la qaatay hoggaanka axsaabta qaranka, madaxweyne ku xigeenadii hore, siyaasiyiin iyo madaxda ururrada bulshada rayidka ah.

kulankan uu madaxweynuhu isugu yeedhay axsaabta qaranka, madaxweyne ku xigeenadii hore iyo ururrada Bulshada rayidka ah, ayaa ujeedadiisu ahayd sidii wada-jir iyo isku duubni loogu wajahi lahaa arrimaha ku gedaaman qabsoomidda doorashooyinka goleyaasha wakiillada iyo deegaanka, waxana ay hoggaanka axsaabta qaranku muujiyeen muhiimadda ay leedahay qabsoomidda doorashooyinku si loo xaqiijiyo geeddi-socodka Dimuqaariyadda Somaliland iyo in meesha laga saaro caqabadaha hortaagan qabsoomidda doorashooyinkaas, isla markaana lagu diyaarin lahaa jawi ay doorashooyinku ku qabsoomi karaan.

Ugu dambayntii waxa ay hoggaanka saddexda xisbi ee UCID, KULMIYE iyo WADDANI wada jir u go’aamiyeen qodobbadan hoos ku qoran:

In doorashada goleyaasha wakiillada iyo deegaanku ku qabsoonto dhammaadka sannadka 2019-ka.
In si wada-jir ah ay uga wada-hawl galaan xallinta iyo dhammaystirka wax kasta oo ku xidhan qabsoomidda doorashada.
In si niyadsami ah loo sii wado wada-tashiga iyo wada-hadallada saddexda guddi ee xisbiyada qaranka.
In wixii caqabad ah ee soo kordha laga wada-tashado.” Sidaa ayaa lagu yidhi Warkan kooban ee Afhayeenka Madaxtooyadu ka soo saaray kulankan Madaxda Xukuumadda iyo Xisbiyada dhex-maray.

Isha Ku Hay Baligubadlemedia

COMMENTS