BALIGUBADLE MEDIA
Muqdiga Habeenimadu Wuxuu Ku Dhamaadaa Dharaar Qoraxiyo Iftiin Badan. “Falsafadii Abdul Kalam” Turjumadii :- C.S.F. (Jeesto).
May 19, 2017 - Written by editor
Falsafaawi Abdul Kalam waxa uu u dhashey dalka hindiya waxa uu ahaa faylasuuf weyn, aragti-dheer, indheer-garad ah, daaqsin geel ka il duufa, aqoonyahan baaxad leh, saynisiyahan dhinaca Physicianska ah, Iyo waliba khabiir dhinaca (Life And Socail Antrapologyga ah) , Ninkani waxa uu caan ku ahaa hal-ku-dhagyo caalamiya oo leh cibaarooyin ama cawaaqib xaqiiqiya oo rubada taamilo ugu filan, Isla markaana uu ku darsan jirey bulshada uu ka soo jeedo iyo caalamka intiisa kale arimahan oo laga dhaxlo koritaan magac , ku dayasho wadadaada la maro oon la raadsan raadedka dadka riqiiska ahi ama aan waxba soo kordhin ka tagaan, Sida ruwaayado, Majaajilooyin, madadaalooyin ama maaweelooyinka waxan loogu yeedha, hadaba waxba sii buun-buunin maayee aan idiin kala baxo mufakirka weyn ee Abdul Kalam iyo idinka bulshooy.
Mr. Kalam waxaa ka ahaa waxyaabihii laga dhaxley hal-ku-dhagan oo falsafad cilmiyeysan ku dhisnaa ama ay ku dheehnayd kaasoo odhanayey (Mugdiga Habeenimadu Wuxuu Ku Dhamaadaa Dharaar Qoraxiyo Iftiin Badan) ujeedka arinkani waa hoge-tusaale dhameystiran oo ku tacaluqey nolosha iyo asbaabta aadamuhu u nool yihiin kuwaasoo mar-marka qaar aad moodo iney bani-aadamku rajo dhigaan , bilaa himilo noqdaan ooy dareemaan liciifnimo ama liidasho xaga nolosha ah, dunida waxaa yaala imtaxaan fara badan, kadeed kaydsan, kurbooyin cul-culus, balse waxa dhigood ah barwaaqo , rayn-rayn, farxad balaadhan, nolol buuxda, xushmad badhaadhe leh, nimco aad iska barkato iyo bilic kaa ifta iyo waliba bilaadhaan kuu gaara intuba waa arkaantii bedka nolosha, markaa looma baahana inaad war-warto markuu waayuhu kugu marooro waayo dhib kasta oo ku soo marta waxa ka danbeysa dheef iyo midho dhacaan leh, Waa siduu hadalka qoraalkiisii fasiraada uu ku sheegay Mr.Abdul Kalam.
Markuu ku leeyahay habeenimadu waa mudgi balse waxay isugu biyo-shubataa qorax iyo iftiin waabari waxa uu ka wadaa in adeyg dhamaantii ama kadeed oo dhami uu ku dhamaado wanaag iyo isbaddel cusub, maxaa yeelay sababtu waa inaanad moodin in noloshoo dhami adag tahay ama amintu aaney kuu qaalibnayn waa haddii uu adayg kugu soo horeeyo, Ogaw markastoo aad dhibaato ama albaabo furmi waaya aad la kulanto waxa talaabo kuu jirta guulooyin fara-badan balse waxa laysu dhaafey fahanka iyo sida loo kala haleeli ogyahay, hadiiba aad u samirto adeygyada iyo shidooyinka waxaa kuu fududaaneysa inaad si dhib yar u guulaysato markaa mucda ujeedada iyo murtida aan faaqidaadan ka dhaxleynaa waa inaan rajada laga quusan oon layska fadhiisan, lagana aamin bixin inuu waagu baryayo oo uu qorax iyo same iftiin ku dhamaanayo mugdigii xaley oo dhan lagu jirey.
Markaa waa in la ogaado nolosha macaankeeda oo laga deg-degin ogaw guusheeduna waxay ku xidhan tahay hadba sida aad u fahanto adoon colaadinayn waxyaabaha caqabadaha ah ee kula soo darsa mana aha inaad war-warto ood ku diga-rogato xaga mugdiga iyo walbahaarka waayo wuxuu ku horseedayaa dib u dhac, nolol ka dhacid, han yaraan, himilo xumo, hadaf liidasho, mooro kugu hagooganta taasoo kuu sahlaysa inaad caadi uga baxdo nolosha saxda ah, Hadaadse garato waxaad tahay qorax soo baxdey oo shiiqeedu iyo shacnigeeda laga dheefsado waa marka aad fahansan tahay nolosha taasi oo kuu horseedaysa yadna cagsigeeda oo ah milgo, maamuus, iyo inaad hesho ama mudato martaabooyinka saxda ah ee nooluhu maleysto.
Ha ku mashquulin hawlaha kadeedan ama kurbooyinka qalafsan ee soo mara nolol maalmeedkaaga aduunyada haw bixin foorayaasha kakan iyo dalcadaha kaa hor-yimaada hadii aad u dhabar adeygto guusha iyo libinta sahal baad ku kasbaneysaa haddiise aad is weydiiso ogaw waxba inaan hore kuugu hagaageyn waayo niyadaad ka naxdey mar hadaad naxdana waa niyad-jabka iyo socosho la,aanta albaabka laga galo , Si aad shamac ifaya oo markuu foore daarey abidkii aanu damin ee uu dib u carto aad noqoto ogaw waligaa waxaad ahaaneysaa (Ul jiiftaa ma jabto), markaa sidaa dhexda u xidho oo ha noqon mid walbahaarku la daadago.
Falsafadii: Abdul Kalam.
Turjumidii: C/raxmaan Sayid Faarax (Jeesto)
Diplomatic Analysis
Gabiley/ Somaliland.

Baligubadlemedia masuul kama aha aragtida dadweynaha

COMMENTS